ٹرمپ کا افریقی ممالک سے متعلق بیان شرمناک ہے، اقوام متحدہ

Sunday, January 14, 2018

قومی آواز نیو یارک

اقوام متحدہ نے افریقی ملکوں سے متعلق ڈونلڈ ٹرمپ کے بےہودہ الفاظ کو شرمناک قرار دیتے ہوئے کہا کہ امریکی صدر کے الفاظ صدمے کا باعث ہیں اور اس بیان نے ساری دنیا کو ہلا کر رکھ دیا ہے۔

امریکی صدر ڈونلڈ ٹرمپ الٹے سیدھے بیانات کی وجہ سے پوری دنیا میں مشہور ہیں اور انہوں نے اپنے ایک حالیہ بیان میں سوال اٹھایا تھا کہ افریقی ممالک سےامیگریشن کیوں کی جائے؟

اقوام متحدہ کے قوانین کے قوانین کے مطابق رنگ و نسل کی بنیاد پر ملکوں یا افراد سے تفریق نہیں برتی جا سکتی لیکن ٹرمپ کے اس بیان سے ناصرف دنیا میں نسل پرستی کی حوصلہ افزائی ہو گی بلکہ اس خطرناک بیان سے لوگوں کی زندگیاں بھی تباہ ہوسکتی ہیں۔

اقوام متحدہ کے انسانی حقوق کمیشن کی جانب سے جاری ایک بیان میں افریقی ممالک سے متعلق ٹرمپ کے بے ہودہ الفاظ کی سخت الفاظ میں مذمت کی گئی ہے۔

انسانی حقوق کمیشن کی جانب سے جاری بیان میں کہا گیا کہ ٹرمپ کے الفاظ نہ صرف صدمے کا باعث اور شرمناک ہیں بلکہ انہوں نے ساری دنیا کو ہلا کر رکھ دیا ہے۔

انسانی حقوق کمیشن کے ترجمان روپرٹ کولول کا کہنا ہے کہ امریکی صدر کے الفاظ اقوام متحدہ کی دوسری جنگ عظیم کے بعد سے دنیا میں مساوات قائم کرنے کی کوششوں کے منافی ہے۔ روپرٹ کولول نے مزید کہا کہ رنگ و نسل کی بنیاد پر ملکوں اور براعظموں سے تفریق نہیں برت سکتے۔

بیان میں کہا گیا کہ اتنے بڑے منصب پر فائز کسی سیاسی شخصیت کے نفرت انگیز الفاظ سے دنیا بھر میں نسل پرستی کے رجحانات کی حوصلہ افزائی ہوگی اور اس قسم کے بیانات سے لوگوں کی زندگیاں بھی تباہ ہو سکتی ہیں۔

امریکی اخبار واشنگٹن پوسٹ کی رپورٹ کے مطابق ڈونلڈ ٹرمپ نے افریقی ممالک سے متعلق تحضیک آمیز الفاظ اوول آفس میں ایک اجلاس میں ادا کئے تھے۔

امریکی صدر کے بیان کے بعد 54 ممالک نے اس پر شدید غم و غصے کا اظہار کرتے ہوئے امریکی صدر سے معافی کا مطالبہ کیا تھا۔