لاہور 18 نومبر ، 2018
قومی آوازلاہور :تبلیغی جماعت کے امیر حاجی عبدالوہاب انتقال کر گئے
حاجی عبدالوہاب گزشتہ ہفتے ڈینگی بخار میں مبتلا ہوئے اور لاہور کے نجی اسپتال میں دوران علاج اپنے خالق حقیقی سے جاملے۔

زندگی بھر اسلام کی دعوت دینے والے حاجی عبدالوہاب کی نماز جنازہ بعد نماز مغرب پنڈال اجتماع گاہ سندر روڈ رائیونڈ میں ادا کی جائے گی۔

تبلیغ کے داعی حاجی عبدالوہاب کا پورا نام راؤ محمد عبدالوہاب تھا اور 1923 میں دہلی میں پیدا ہوئے، تقسیم ہند کے بعد ٹوپیاں والا بورے والا ضلع وہاڑی منتقل ہوئے۔

انہوں نے تعلیم گورنمنٹ اسلامیہ کالج لاہور سے حاصل کی اور بطور تحصیلدار فرائض بھی سرانجام دیے۔

مولانا عبد الوہاب تبلیغی جماعت کے بانی محمد الیاس کاندھلوی کے زمانے سے ہی تبلیغی جماعت سے منسلک ہوئے اور وہ پاکستان کی تبلیغی جماعت کے تیسرے امیر تھے۔

مولانا عبدالواہاب کے انتقال پر اظہار افسوس

وزیراعظم عمران خان نے تبلیغی جماعت کے امیر حاجی عبدالوہاب کی وفات پر افسوس کا اظہار کرتے ہوئے کہا کہ بطور عالم دین ان کی شخصیت اور گراں قدر دینی خدمات کو ہمیشہ یاد رکھا جائے گا، اللہ تعالی مرحوم کو جنت الفردوس میں اعلی مقام عطا کرے

وزیراعلیٰ عثمان بزدار نے حاجی عبدالوہاب کے انتقال پر دکھ اور افسوس کا اظہار کرتے ہوئے ان کی دینی خدمات کو خراج تحسین کیا اور کہا کہ دین اسلام اور تبلیغِ دین کے لئے حاجی عبدالوہاب کی خدمات کو ہمیشہ یاد رکھا جائے گا۔

وفاقی وزیر مذہبی امور صاحبزادہ پیر نورالحق قادری نے حاجی عبدالوہاب کے انتقال پر دکھ کا اظہار کرتے ہوئے ان کے لواحقین سے تعزیت کی اور مرحول کے درجات کی بلندی کے لیے بھی دعا کی۔

امیر جماعت اسلامی سینیٹر سراج الحق نے مولانا عبد الوہاب کے انتقال پر دکھ اور افسوس کا اظہار کرتے ہوئے کہا کہ مرحوم نے پوری زندگی اسلام کی دعوت و تبلیغ کا کام کیا، اسلام کی تبلیغ و اشاعت کے لیے مولانا کی خدمات ناقابل فراموش ہیں۔

پنجاب اسمبلی میں قائد حزب اختلاف حمزہ شہباز نے اپنے تعزیتی بیان میں کہا کہ حاجی عبدالوہاب کا انتقال عالم اسلام کے لیے ایک بڑا نقصان ہے،انہوں نے امن، محبت، بھائی چارے، خدمت گزاری کو اپنا اوڑھنا بچھونا بنایا، اللہ کریم مولانا عبدالوہاب سے وابستہ تمام افراد کو صبر عطا فرمائے۔

مسلم لیگ (ن) کے رہنما احسن اقبال نے تبلیغی جماعت کے امیر کے انتقال پر دکھ کا اظہار کرتے ہوئے کہا کہ حاجی عبدالوہاب کے انتقال سے مسلم دنیا ایک جید عالم سے محروم ہوگئی، دین اسلام کے لیے ان کی خدمات ہمیشہ یاد رکھی جائیں گی۔
حاجی عبدالوہاب کی نمازجنازہ میں شرکت کے خواہشمندوں کا کراچی ایئرپورٹ پر رش

رش بڑھتے ہی ایرلائینز نے کرائے میں اضافہ کردیا، مسافروں کی شکایت، ایک خصوصی پرواز چلارہے ہیں، فوری طور پر اضافی پروازیں چلانا ممکن نہیں، ترجمان پی آئی اے۔ فوٹو: فائل
کراچی: تبلیغی جماعت کے امیر مولانا حاجی عبدالوہاب کی نماز جنازہ میں شرکت کے لیے جانے والے خواہشمندوں کی بڑی تعداد جناح انٹرنیشنل ایئرپورٹ پہنچ گئی جب کہ مسافروں نے کرائے میں اضافی کی بھی شکایت کی ہے۔

قومی ایئرلائن کی جانب سے مولانا عبدالوہاب کی نماز جنازہ میں شرکت کرنے والوں کے لیے خصوصی پرواز چلائی جارہی ہے تاہم اس کے باوجود ایئرپورٹ پر شدید رش ہے۔

ذرائع کے مطابق پی آئی اے اور نجی ایر لائنز کے طیاروں میں مطلوبہ نشستیں دستیاب نہیں جب کہ مسافروں نے شکایت کی ہے کہ رش بڑھتے ہی ایرلائینز نے کرائے میں اضافہ کردیا ہے۔

مسافروں کا کہنا ہے کہ لاہور کا کرایہ 40 ہزار تک وصول کیا جا رہا ہے جس پر ایئر لائنز انتظامیہ کا مؤقف ہے کہ ریوینیو منجمنٹ سسٹم کے تحت کرائے میں اضافہ ہوجاتا ہے۔

دوسری جانب ترجمان پی آئی اے کا کہنا ہے کہ کراچی سے دوپہر تین بجے لاہور کے لیے 400 نشستوں والا بوئنگ 777 طیارہ روانہ ہوگا اور شام 7 بجے پی آئی اے کی ایک اور پرواز بھی لاہور جائے گی تاہم فوری طور پر اضافی پروازیں چلانا ممکن نہیں۔