سعودی عرب اس وقت قطر سے بات کرنے پر آمادہ نظر نہیں آتا، ریکس ٹیلرسن

قومی آواز ۔ دوحا
Monday, October 23, 2017
امریکی وزیر خارجہ ریکس ٹیلرسن کا کہنا ہے کہ سعودی عرب اور قطر کے درمیان جاری تنازع میں فی الحال مذاکرات شروع ہونے کا امکان نہیں ہے۔

امریکی وزیر خارجہ ریکس ٹیلرسن ان دنوں مشرق وسطیٰ اور ایشیا کے دورے پر ہیں جو سعودی عرب میں اہم ملاقاتوں کے بعد قطر کے دارالحکومت دوحا پہنچے۔

ریکس ٹیلرسن نے قطری رہنماؤں سے گفتگو میں کہا کہ سعودی عرب اس وقت دوحا ریاض تنازع پر بات کرنے کے لیے آمادہ نظر نہیں آتا۔

خیال رہے کہ امریکی وزیر خارجہ سعودی عرب اور قطر کے دورے کے بعد بھارت کے علاوہ پاکستان بھی آئیں گے جہاں علاقائی امور پر اہم بات چیت کا امکان ہے۔

اس سے قبل سعودی عرب کے دورے کے موقع پر اپنے سعودی ہم منصب کے ہمراہ مشترکہ پریس کانفرنس کے دوران ان کا کہنا تھا کہ داعش کے خلاف جنگ اختتام کے قریب ہے اس لئے عراق میں لڑنے والی ایرانی ملیشیا اور غیر ملکی جنگجو واپس چلے جائیں۔

ریکس ٹیلرسن نے کہا کہ عراق کے عوام کو موقع دیا جائے کہ وہ اپنے نظام کو دوبارہ اپنے اختیار میں لے سکیں۔

اس سے قبل ریکس ٹلرسن نے سعودی فرمانروا شاہ سلمان سے بھی ملاقات کی، اس موقع پرعراقی وزیراعظم حیدرالعابدی بھی موجود تھے۔