قومی آواز ۔ ٹورنٹو

کنزرویٹیو پروگریسو پارٹی کے سربراہ پیٹرک براﺅن کے ایک اسکینڈل میں مبینہ طور پر ملوث ہونے کی خبروں اور بعد ازاں ان کے استعفے کے بعد کنزرویٹیو پارٹی ایک بحران کا شکار ہو گئی ہے لیکن لطف کی بات یہ ہے کہ کنزرویٹیو کے ساتھ ساتھ لبرلز اور این ڈی پی بھی اس صورتحال سے پریشان ہیں اور ماہرین سیاست اور قانون کا کہنا ہے کہ اس صورتحال میں الیکشن پلان بھی متاثر ہونے کا خدشہ ہے۔ الیکشن مہم مئی میں شروع ہو گی جبکہ اس سے قبل پریمئیر کیتھلین وین جو پیٹرک براﺅن کے مد مقابل واحد لیڈر تھیں ان کے منظر سیاست سے غائب ہو جانے کے بعد کافی پریشان ہیں کہ اب وہ کس سے مقابلہ کریں کیونکہ اس وقت کوئی بھی بڑا اپوزیشن لیڈر ان کے سامنے موجود نہیں ہے۔ اس وقت کیتھلین وین اور این ڈی پی کے اینڈریو ہوارتھ دونوں یہ انتظار کر رہے ہیں کہ ان کا نیا مد مقابل کون ہوتا ہے۔اگلے چھ سے نو ماہ میں سیاسی جماعتوں کو اپنا الیکشن پلان بنانا ہے لیکن منظر صاف نہ ہونے سے ان جماعتوں کے لئے صحیح طریقے سے الیکشن میں اترنا بہت مشکل ہو گا۔